জ্যোতি সংগীত - জোনাকী কাৰেঙত কোনে বীণ বায় (নিমাতী কইনা)

 জোনাকী কাৰেঙত কোনে বীণ বায়
                          (নিমাতী কইনা)
জোনাকী কাৰেঙত কোনে বীণ বায়?
জোনাকী কাৰেঙত কোনে বীণ বায়?
পোহৰে পোহৰে হাঁহি বিলায় !
আমাৰে নিমাতীৰ কোনে মাত ফুটাব
ওঁঠতে হাঁহিটি দিব বুলাই।
আমাৰ নিমাতীজনী
নীল সাগৰৰ হীৰা মণি
অৰুণৰ হাঁহিৰে মুখনি বোলোৱা
আলাসৰ প্ৰতিমাখনি।
হাঁহো-হাঁহোকৈ
চকু দুপাহিয়ে
হঁহা নাই অতদিনে।
মাতো মাতোকৈ
ওঁঠ দুখনিয়ে
অমাতেৰে মন জিনে।
ধিয়ানে-গিয়ানে সচিতে-সপোনে
কাকনো বিচাৰে কাকনো চায়?
বীণখনি বায়
কোনেনো দিবহি হাঁহি ফুলাই?
নিমাতী কইনাৰ মাত ফুটা নাই
অ' মাত ফুটা নাই
জোনাকী কাৰেঙত কোনে বীণ বায়?